200 të arrestuar në operacionin kundër Ndrangheta-s, në pranga edhe politikanë

Oficerë të agjencive ligjzbatuese në Itali zhvilluan të enjten një operacion kundër krimit të organizuar, duke vënë në pranga 200 anëtarë të mafias kalabreze.

Sipas raportimeve të mediave italiane, operacioni u fokusua në qytetin e Kozencës, në jug të vendit fqinj, dhe gjatë tij, përveç eksponentëve të krimit të organizuar u arrestuan edhe zyrtarë të pushtetit lokal.

Konkretisht, në pranga përfunduan edhe një kryetar bashkie, një avokat dhe presidenti i Shoqatës së Komunave Italiane, të cilët dyshohen për bashkëpunim me mafian.

Ndërkohë, anëtarët e sindikatës së plotfuqishme të krimit, Ndrangheta, akuzohen për ushtrim të kriminalitetit të stilit mafioz, trafik lëndësh narkotike, organizim lojërash të paligjshme fati, pastrim parash dhe transferim të fshehtë të pasurive.

Gjatë operacionit u sekuestruan gjithashtu një seri pronash të patundshme, me vlerë 72 milionë euro, të siguruara nga aktivitete ilegale.

Në aksion morën pjesë efektivë të policisë italiane, karabinierëve, Guardia di Finanzas, nën koordinimin e Drejtorisë Rajonale të Antimafias.

LEXONI GJITHASHTU:

• Policia belge e fokusuar te mafia shqiptare, thotë gazetari
• Goditet mafia shqiptare në Belgjikë, 30 të arrestuar