Laborator COVID-19 edhe në QSUT, do të analizojë testet e pacientëve që shtrohen në spitale

Qendra Spitalore Universitare e Tiranës (QSUT) ka tashmë gati laboratorin që mund të analizojë veçmas testet për COVID-19 të të gjithë pacientëve që shtrohen në Tiranë.

Ministrja e Shëndetësisë, Ogerta Manastirliu dhe Silvia Bino një nga drejtueset e Institutit të Shëndetit Publik (ISHP) vizituan mesditën e së premtes mjediset e laboratorit, që bëhet zyrtarisht i dyti pas atij të Institutit të Shëndetit Publik, që mund të analizojë mostrat e marra me tamponë për COVID-19, ose ndryshe të kryejë testet PCR.

Laboratori i ri, i certifikuar nga ISHP-ja dhe Organizata Botërore e Shëndetësisë (OBSH) do të marrë përsipër analizimin e testeve për pacientët që do të shtrohen në pavijonet e spitaleve të QSUT-së dhe Spitalit Shefqet Ndroqi, i cili së fundmi është ripërshtatur si Spitali COVID-2.

Profesor Andi Koraqi i tregoi ministres mjediset e laboratorit dhe theksoi se “gjithçka është gati” dhe tashmë “priten vetëm mostrat”.

Bino siguroi se laboratori i plotëson të gjitha kushtet e biosigurisë dhe se do të jetë një ndihmë e madhe për luftën ndaj COVID-19.

Deri më sot të gjitha analizat e testeve për COVID-19 kryheshin në laboratorin e ISHP-së. Ekspertë të shëndetësisë kanë deklaruar shpesh në intervista për Euronews Albania se kjo mënyrë e centralizuar i la spitalet pa mbrojtjen e duhur përballë infeksionit.

Disa herë qytetarët janë ankuar se u infektuan në spitale, ndërsa shpesh janë raportuar edhe raste të infektimit të mjekëve nga pacientë, ku këta të fundit hospitalizoheshin pa iu bërë test për COVID-19.

Lexoni gjithashtu:

Bilanci i pandemisë, muaj tragjik për Shqipërinë çdo ditë mesatarisht 2 vdekje dhe 75 raste të reja

Manastirliu: Situata serioze, pavarësisht investimeve sistemi i shëndetësisë ende delikat për të përballuar fluks të madh

Testimet për COVID-19, mjeku Hoxha: QSUT i ka pajisjet dhe mund të bëjë deri në 1000 teste në ditë

Mjeku Arjan Mezini: Duhet decentralizuar testimi dhe trajtimi i COVID-19, kjo histori nuk do të jetë e shkurtër

Shqipëria e përball valën e dytë të COVID-19 me numrin më të ulët të testeve në rajon

Mjeku ndërron jetë nga COVID, Yuri Kim: Dha jetën në shërbim, do të kujtohet si hero