Nis rindërtimi në Farkë, Rama: Familjeve me disa kurora do t’u ndërtohen nga një shtëpi secilës

Të premten u vendosën tullat e para të banesave private në zonën e Farkës, të cilat po ndërtohen nga themelet pasi u dëmtuan nga tërmeti i 26 nëntorit.

Kryeministri Edi Rama bëri me dije se në fazën e parë të rindërtimit në Farkë përfshihen 200 banesa individuale dhe se shumë shpejt do të niset me 150 shtëpi të tjera.

“Me siguri deri në 26 nëntor shumë e shumë të tjerë do jenë në shtëpitë e tyre, për ta kujtuar këtë vit si një vit i cili ndryshon jetën e tyre,” – u shpreh Rama.

Kryetari i Bashkisë Tiranë Erion Veliaj tha se ndërtimi i banesave nga e para do të bëhet në truallin e vjetër të tyre, ndërsa nuk ekziston mundësia që shtëpia e prishur nga tërmeti të mbahet. Veliaj sqaroi edhe se si po veprohet me familjet ku jetonin disa kurora së bashku.

“Kanë qenë katër familje me një monovolum, sipas porosisë që ju keni lënë, ne atyre u bëjmë katër shtëpi,” – u shpreh Veliaj.

“Po s’na shatë ju, ne nuk e mbledhim dot mendjen fort. Sa më shumë që na shani ju, aq më shumë na motivoni kështu që nga një shtëpi, katër shtëpi. Koalicion shpish. Mos u ankoni se nuk lejohen koalicion, koalicionet lejohen. Të gjithë bashkë, por secili në çatinë e vet që të mos krijohet sherr brenda për brenda,” – tha kryeministri Rama.

Lexoni gjithashtu:

Qeveria jep 5.6 milionë dollarë, nis shpërndarja e granteve për shtëpitë e dëmtuara nga tërmeti në Tiranë

KE miraton fondet për rindërtimin në Shqipëri, 100 mln euro për shkollat dhe objektet arkeologjike

Grantet për rindërtimin në Tiranë, familjet me dy banesa nuk përfitojnë