Aubameyang te Chelsea pas 6 muajsh tek Barcelona, Balotelli kalon në Sion

Aventura e Pierre-Emerick Aubameyang  tek Barcelona zgjati vetëm 6 muaj. Shtëpia e tij e re do të jetë sërish Premier League, skuadra angleze e Chelsea.

Sulmuesi 33-vjeçar largohet nga Spanja për t’u bashkuar me trajnerin Tomas Tuchel.

Chelsea i ka dhënë Barcelonës mbrojtësin anësor Marcos Alonso plus 14 milionë euro për të marrë sulmuesin, i cili do ketë si partner Armando Brojën në Londër.

Në klubin katalanas gabonezi shënoi 13 gola në 24 paraqitje.

Kampionët e Afrikës senegaleze patën një ditë të turbullt, sikundër edhe Idrissa Gana Gueye. Mesfushori është larguar nga PSG për të nënshkruar me ish-klubin e Everton. Ndërsa shoku i tij i skuadrës në Paris Abdou Diallo transferohet në Leipzig të Gjermanisë.

E së fundmi një nga surprizat e transfertave është edhe Mario Balotelli, i cili largohet nga klubi turk Adana Demirspor dhe kalon në Sion të Zvicrës.

Ekipi turk konfirmoi se është arritur një marrëveshje për transferimin e sulmuesit për 2.6 milionë euro.

32-vjeçari në karrierën e tij deri më tani ka luajtur për Inter, Manchester City, Milan, Liverpool, Marseille dhe Brescia. Ai ka 36 paraqitje për Kombëtaren italiane dhe ka shënuar 14 gola.

LEXONI GJITHASHTU:

• Mbyllet merkatoja e futbollistëve, cilat janë ekipet me blerjet më të mira