Ankesa të reja në Gjykatën Supreme kundër rezultatit të zgjedhjeve në Kosovë

Të tjera ankesa janë dërguar pak para afatit të fundit kundër vendimeve të Panelit Zgjedhor për Ankesa dhe Parashtresa për rezultatin përfundimtar të zgjedhjeve në Kosovë.

Kandidati për deputet nga radhët e PDK-së, Bekim Haxhiu ka konfirmuar për Euronews Albania se e ka dorëzuar ankesën e tij në Gjykatën Supreme, pak pas mesditës. Haxhiu pretendon se ka pasur parregulli në numërimin e votave të kandidatëve të partisë së tij, dhe kërkon rinumërim. Pretendimi i tij është hedhur poshtë disa herë.

Edhe Lista Serbe ka dërguar ankesë në Gjykatën Supreme. Sipas kësaj partie, në vendimin e vet PZAP nuk e mohon se Nenad Rashiq është zgjedhur deputet me votat e shqiptarëve.

“Çështja kryesore që ia kemi paraqitur Panelit Zgjedhor, e tani ia paraqesim edhe Gjykatës Supreme, është nëse në këtë mënyrë është cenuar e drejta kushtetuese e popullit serb për përfaqësim autentik, duke pasur parasysh se vendet e rezervuara janë kategori kushtetuese pikërisht për mbrojtjen e kësaj të drejte”, thuhet në njoftimin ë kësaj partie.

Kjo është hera e fundit që palët mund të ankohen për rezultatin e zgjedhjeve. Nëse Supremja i hedh poshtë ankesat, KQZ-ja javën tjetër do të certifikojë rezultatet duke hapur rrugën për betimin e deputetëve dhe krijimin e Legjislaturës s XI-të të Kuvendit të Kosovës.