Punime për kanalizimet, Bashkia Tiranë njofton si do të devijohet qarkullimi në ”Rrugën e Durrësit”

Bashkia Tiranë njoftoi të martën se do të kryejë punime në disa rrugë të kryeqytetit duke u kërkuar ndjesë qytetarëve për shqetësimet që mund të hasin në qarkullimin me automjete.

Për shkak të punimeve për rehabilitimin e kanalizimeve në “Rrugën e Durrësit” qarkullimi i makinave do të jetë i kufizuar nga rruga “Ded Gjo Luli” (qendër) deri te sheshi “Karl Topia” (rrethrrotullimi i Zogut të Zi).

Bashkia thotë se punimet do të zhvillohen në tre faza.

Faza e parë: Ndalohet qarkullimi në rrugën “Asim Vokshi” (pjesa e Unazës drejt Zogut të Zi, krahu verilindor nga rruga Don Bosko) në afërsi të sheshit “Karl Topia”.

Faza e dytë: Ndalohet qarkullimi në “Rrugën e Durrësit” nga sheshi “Karl Topia” deri në kryqëzimin me “Kafe Flora”. Qarkullimi zhvendoset në rrugën “Mine Peza” ku do të ndalohet parkimi dhe aty do të zhvendoset edhe linja e transportit urban.

Faza e tretë: Ndalohet qarkullimi nga kryqëzimi te “Kafe Flora” deri te segmenti i “Rrugës së Durrësit” që lidhet me sheshin Skënderbej.

Bashkia zotohet se do të kryejë punimet natën në mënyrë që të mos rëndojë qarkullimin e makinave dhe sidomos lëvizjen në Unazë – kjo për sa i përket punimeve në rrugën “Asim Vokshi” dhe “Hysni Gërbolli”.