Perimetër sigurie në Zaporizhia, shefi i OKB: Moska dhe Kievi të ndalojnë luftimet

Shefi i OKB-së ka mbështetur thirrjet e organizatave joqeveritare për krijimin e një zone sigurie përreth impiantit bërthamor në Zaporizhia, në Ukrainë.

Deklaratën e tij, Antonio Guterres e bëri gjatë një takimi të jashtëzakonshëm të Këshillit të Sigurimit, të thirrur nga Rusia për të diskutuar raportin e misionit të OKB-së në central.

“Forcat ruse dhe ato ukrainase duhet të zotohen që të mos angazhohen më në aktivitete ushtarake ndaj impiantit. Centrali i Zaporizhias dhe rrethinat e tij nuk duhet të jenë objekt operacionesh ushtarake. Hapi i dytë është krijimi i një perimetri të demilitarizuar dhe sigurimi i tij”, u shpreh ai.

Si Rusia edhe Ukraina vazhduan të fajësojnë njëra-tjetrën për sulmet ndaj impiantit.

“Na vjen keq që në raportin tuaj mbi përmbushjen e masave të sigurisë nga Ukraina që prej prillit deri në shtator të këtij viti, autori i bombardimeve nuk citohet”, tha Vasily Nebenzya, ambasador i Rusisë në OKB.

Javën e kaluar, inspektorët e OKB-së vizituan impiantin e kontrolluar nga rusët. Bombardimet vijuan edhe atë ditë dhe kreu i Agjencisë Ndërkombëtare për Energjinë Atomike paralajmëroi për një rrezik katastrofe bërthamore.

Edhe pse Agjencia nuk ia atribuoi fajin njërës apo tjetrës palë, ajo deklaroi se ka një nevojë urgjente për “masa të përkohshme” për të parandaluar një incident bërthamor eventual, si pasojë e bombardimeve.

Të gjitha palët duhet të bien dakord për ngritjen e një zone mbrojtëse për të shmangur dëme të mëtejshme , deklaroi kreu i agjencisë, Rafael Grossi.

LEXONI GJITHASHTU

• Zelenski: Të krijohet zona e sigurisë në centralin bërthamor të Zaporizhias
• Erdogan telefonatë Putin, oferta për termocentralin e Zaporizhias
• Frika për një Çernobil në Zaporizhia, inspektorët e OKB-së zbarkojnë në Kiev