Bruno Dey, ish-roje në kampin e përqendrimit nazist, dënohet në moshën 93-vjeçare

Një gjykatë gjermane ka dënuar një 93-vjeçar, ish-pjesëtar të Gestapos naziste, për ndihmën e dhënë në vrasjen e të burgosurve në kampin e përqendrimit nazist të Stuffhof, ku shërbeu si roje në muajt e fundit të Luftës së Dytë Botërore.

Bruno Dey mori një dënim dy-vjeçar me kusht nga gjykata shtetërore e Hamburgut, ku u dënua me 5,232 akuza si ndihmës në vrasjet e kryera në kamp.

Kjo shifër është e barabartë me numrin e njerëzve që janë vrarë gjatë periudhës që ai ka shërbyer në kampin nazist në vitet 1944-1945.

Për arsye se Dey ishte vetëm 17 vjeç gjatë kohës së krimeve për të cilat akuzohet, çështja e tij u shqyrtua në një gjykatë për të mitur. Prokurorët kërkuan një dënim 3-vjeçar.

Gjyqi nisi në tetor, dhe për shkak të moshës së madhe të Dey, seancat gjyqësore ishin të kufizuara deri në dy seanca nga dy orë e gjysmë në javë. Gjithashtu në seancat gjyqësore u morën edhe masa të tjera mbrojtëse për pandeminë.

Në fjalët mbyllëse në gjyq, pensionisti 93-vjeçar, i cili qëndronte në një karrocë, kërkoi falje për rolin e tij në makinerinë shkatërruese të nazistëve duke thënë se “diçka e tillë nuk duhet të përsëritet kurrë”.

“Sot dua t’u kërkoj falje të gjithë personave që ishin pjesë e atij makthi”, tha Dey.

Edhe pse numri i të dyshuarve për krimet e nazizmit po pakësohet për shkak të moshës së vjetër, prokurorët ende po përpiqen t’i nxjerrin të dyshuarit para drejtësisë.