Meta pret Bashën në Presidencë dhe e paralajmëron të mos bjerë pre e asnjë provokimi

Presidenti Ilir Meta ka zhvilluar një takim në presidencë me kreun e Partisë Demokratike, Lulzim Basha. Përmes një statusi në faqen e vet në Facebook, kreu i shtetit shprehet se e kishte takuar kryedemokratin me kërkesën e tij për t’i siguruar se do të dekretoj menjëherë Kodit Zgjedhor në respekt të Marrëveshjes konsensuale të 5 qershorit.

Veç të tjerash, kreu i shtetit shprehet se i kishte kërkuar kreut të PD të vazhdojë punën në Këshillin Politik dhe të mos bjerë pre e asnjë provokimi.

“E falenderova për kontributin konstruktiv në arritjen e Marrëveshjes së 5 qershorit dhe i kërkova të vazhdojnë punën në Këshillin Politik në frymën e konsensusit duke mos rënë pre e asnjë provokimi.

Inkurajova vijimin e bashkëpunimit të ngushtë me të gjithë partnerët e investuar për çeljen sa më parë të negociatave të anëtarësimit të Shqipërisë me Bashkimin Europian dhe që kanë mbështetur Këshillin Politik në frymën e konsensusit dhe gjithëpërfshirjes”, shkruan kreun u shtetit.

Më herët gjatë ditës presidenti zhvilloi një takim me ambasadorët e BE, të cilët gjithashtu i kishte siguruar se do të dekretonte ndryshimet në kodin zgjedhor në bazë të marrëveshjes së 5 qershorit, ndërsa i cilësoi të papranueshme ndryshimet e njëanshme kushtetuese.