Ministrja shpreh trishtimin për vdekjen e gardistit që e shoqëronte nga COVID-19

Një punonjës i Gardës së Republikës ka humbur jetën ditën e sotme për shkak të coronavirusit. 

Mësohet se viktima ishte shoqërues i ministres për Marrëdhëniet me Parlamentin, Elisa Spiropali.

Kjo e fundit përmes një statusi në faqen e vet në Facebook ka shprehur tronditjen e thellë për humbjen e papritur të njeriut, që siç thitë e shoqëronte kudo prej një viti e gjysmë.

“12 orë në ditë, për 1 vit e gjysmë, më shoqërove kudo, i duruar, i vëmendshëm, i kujdesshëm. Çdo ditë sillje maskat, ujin, i vendosje tek dera e makinës, më tërhiqje vërejtje se pija pak. E thoshe me krenari që s’kishe pirë kurrë një aspirinë.

Kur më lajmëruan që ke humbur vetëdijen dhe të kanë intubuar, tronditja ishte aq e madhe sa nuk nxora dot asnjë fjalë.

Vetëm lot që rridhnin pa kontroll. Sot, që ky virus i pabesë të mori frymën dhe jetën, s’kam më as lot. Nalta të adhuronte, çdo njëri nga ne që të njohu të donte dhe të respektonte. Na ke tronditur dhe trishtuar thellësisht.

Për familjen tënde nuk ka ngushëllim, por ne do iu gjendemi gjithmonë! Prehu i qetë, Gani! Dritë pastë shpirti yt i mirë!”, shkruan ministrja Spiropali në Facebook.