Lirohen nga detyra tre zëvendësministre, mes tyre dhe Rovena Voda

Me urdhër dhe porosi direkte të kryeministrit Edi Rama janë liruar sot nga detyra tre zëvendësministre. Bëhet fjalë për zëvendësministren e infrastrukturës dhe Energjisë, Dorina Çinari, zëvendësministren e Drejtësisë Fjoralba Caka si dhe zëvendësministren e Brendshme, Rovena Voda.

Ajo që mbetet e paqartë lidhet me arsyet, të cilat e kanë çuar kryeministrin e vendit të lirojë nga detyra tre funksionaret në fjalë. Zonja Fjoralba Caka ka reaguar publikisht në faqen e saj në “Facebook”, ku thotë se arsyet e largimit janë personale.

 “Për arsye që nuk lidhen absolutisht me objektin e veprimtarisë së punës sime apo aktivitetit tim publik dhe tërësisht vetjake, më duhet që nga sot të tërhiqem nga funksioni im si Zëvendësministre e Drejtësisë. Dëshiroj t’i shpreh mirënjohjen Kryeministrit të Shqipërisë, Z. Edi Rama, për nderin dhe privilegjin që më ofroi për të shërbyer si Zëvendësministre e Drejtësisë. Është një mundësi e papërsëritshme të jesh sot mes proceseve më të rëndësishme shtetformuese të vendit dhe të të besohet hapësira që të japësh kontributin tënd modest, mbështetur në një vizion të qartë për një Shqipëri më të mirë”, thekson ajo.