Artan Hoxha zgjidhet Rektor i ri i Universitetit të Tiranës

Në kushte pandemie këtë të enjte, studentë dhe staf akademik iu drejtuan mjediseve të fakulteteve për të votuar drejtuesit e universitetit. Në 12 universitetet publike të vendit, votuesit detyrimisht duhet të ishin të pajisur me maskë.

Me 348 vota të personelit akademik, Dekani i Fakultetit të Drejtësisë Artan Hoxha është zgjedhur Rektori i ri i Universitetit të Tiranës.

Pas tij, është renditur pedagogia e Fakultetit të Shkencave të Natyrës Mimoza Hafizi me 176 vota dhe e treta është renditur Kozeta Sevrani, pedagoge e Fakultetit Ekonomik me 122 vota.

Krahas Tiranës, procesi i numërimi të votave vijon edhe në universitet e tjera të vendit, ku dhe priten të dalin emrat e fituesve. 

Ndërkaq, janë ende në numërim e sipër votat e studentëve. Në zgjedhjet e mbajtura sot, numri i studentëve që votuan ishte i pakët për shkak të situatës së pandemisë dhe pamundësisë së disa prej tyre për të ardhur nga rrethet në kryeqytet.