Ambasada Amerikane: Ngërçi me Gjykatën Kushtetuese të çohet në Komisionin e Venecias

Ambasada e Shteteve të Bashkuara të Amerikës në Shqipëri publikoi sot një deklaratë për shtyp, ku mbështeti dërgimin e çështjes së Gjykatës Kushtetuese në Komisionin e Venecias.

“Në mungesë të një institucioni të përshtatshëm ligjor, i cili mund të vendoste mbi intepretimet e kundërta, Shtetet e Bashkuara mbështesin çuarjen e çështjes në Komisionin e Venecias, si një palë e tretë kompetente dhe e paanshme, për opinionin e tij ligjor,” thuhet në deklaratë.

Interpretimet e ndryshme në emërimin e anëtarëve të Gjykatës Kushtetuese kanë ndarë parlamentin me Presidentin, duke sjellë kështu një paqartësi mbi fatin e Kushtetueses, një institucion kyç në garantimin e zbatimit të ligjit më të lartë në vend, Kushtetutës.

SHBA e cilësoi reformën në drejtësi një nga prioritetet e saj në vend dhe tha se ringritja e Gjykatës Kushtetuese është një hap madhor në procesin e reformës në gjyqësor.

“Nxisim palët kundërshtuese që të respektojnë opinionin ligjor të Komisionit të Venecias,” bëri thirrje Ambasada Amerikane në Tiranë, duke shtuar se dakordësia dhe funksionimi i shtetit të së drejtës është në përputhje me aspiratat evropiane të vendit.

Në një përgjigje ekskluzive për Euronews Albania dy ditë më parë, Maja Koçijançiç, Zëdhënësja për Çështjet e Jashtme dhe Politikat e Sigurisë së BE bëri gjithashtu thirrje për zgjidhjen e ngërçit në Gjykatën Kushtetuese, ku sugjeroi Komisionin e Venecias si mënyrën më efektive të zgjidhjes me përparësi të situatës.