Zjarret në pyje e kullota, Meta fton strukturat shtetërore të ruajnë jetën e qytetarëve

Me rritjen e temperaturave janë shtuar edhe vatrat e zjarreve në vend. Gjatë ditëve të fundit shumë pyje, kullota e pisha janë kapluar nga flakët, duke bërë që kjo pasuri të kërcënohet seriozisht.

Për këtë situatë mjedisore ka shprehur shqetësimin edhe Presidenti i Republikës, Ilir Meta. Me një reagim të shpërndarë për mediat, Kreu i Shtetit ka ftuar autoritetet qendrore dhe vendore për koordinimin në kohë dhe marrjen e masave të menjëhershme për të neutarlizuar çdo vatër zjarri, e cila dëmton pasurinë publike, kombëtare dhe atë private.

Përmes zëdhënësit të tij Tedi Blushi, Meta thekson se parësorja në këtë situatë është eliminimi i çdo rreziku, që mund të lë pasoja për jetën e qytetarëve.

Djegia e pyjeve dhe kullotave gjatë stinës së verës mbetet një fenomen shqetësues. Kjo dukuri për fat të keq ka ndodhur edhe në vitet e kaluara, ndërsa ka pasur raste që zjarrvënia ka qenë e qëllimshme.