Abakarov ‘vishet’ me Himnin shqiptar, mundësi tregon synimet

1 javë pasi ngriti lart flamurin shqiptar duke rrëmbyer medaljen e artë në botërorin e mundjes në Beograd, Zelimkhan Abakarov është pritur në pallatin e sportit Fahrie Hoti në kryeqytet.

Nën Himnin kombëtar, nisi ceremonia për mikpritjen e mundësit me nënshtetësi shqiptare.

29-vjeçari nuk i ka fshehur emocionet ndërkohë që na tregon kundërshtarin më të fortë me të cilin u përball.

“Çdo ëprleshje ka qenë një mundje e vështirë, prandaj dhe nuk mund të nënvlerësohej asnjëherë, por ajo që unë mund të vlerësoja, ishte ndeshja në gjysmë finale kundër vendasit serbë, i cili synonte medaljen e artë.”

Shqipëria ishte shumë pranë një tjetër medalje në Beograd e cila u humb në sekondat e fundit.

“Ne ishim më pak se 30 sekonda rreth medaljes së bronzit dhe sinqerisht, ka qenë një gëzim dhe dëshpërim, por unë mendoj se ka qenë një sukses”

Për presidentin e Komitetit Olimpik Kombëtar Shqiptar, Fidel Ylli medaljet e arit duhet të synohen dhe në Lojërat Olimpike.

“Objektivat tonë janë që medaljet nuk duhet të jenë vetëm botëror por dhe në Olimpiadë. Unë e kam thënë dhe e them se mundja, peshëngritja, boksi, janë sportet që shqiptarët e kanë traditë”- tha Fidel Ylli.

Në datat 23-24 shtator zhvillohet kupa e republikës së Shqipërisë në mundje për të rritur.

LEXONI GJITHASHTU: 

• ‘Besonim te fitorja’, trajneri i Zelimkhan Abakarov flet për Euronews Albania
• Shqipëria për herë të parë me medalje ari në mundje