SHBA në krah të SPAK-ut: Prokurorët dhe gjykatësit të lejohen të bëjnë punën e tyre

Ambasada e Shteteve të Bashkuara të Amerikës në Tiranë ka përgëzuar punën e Policisë dhe të SPAK-ut. Me një shënim në faqen e saj zyrtare në “Facebook”, ambasada thekson se profesionistët e vërtetë të drejtësisë duhet të lejohen të vijojnë punën e tyre pa kërcënime, pavarësisht se cili person merret si i pandehur.

“Ambasada e SHBA-së mbështet me forcë punën e pavarur dhe profesionale të Policisë së Shtetit dhe SPAK-ut. Profesionistët e sistemit të drejtësisë – oficerët e policisë, prokurorët dhe gjykatësit – duhet të lejohen të bëjnë punën e tyre pa kërcënime dhe kanosje, pavarësisht kush është i pandehur”,  thekson ambasada.

Sipas ambasadës së SHBA-së detyra kryesore e drejtësisë është që të luftojë me çdo mjet krimin e organizuar dhe korrupsionin dhe t’i hapë rrugë integrimit të Shqipërisë në familjen e Bashkimit Evropian.

“Ka ardhur koha që të lejohen të kryejnë detyrat e tyre dhe të mbështeten përpjekjet e tyre për të luftuar krimin e organizuar. Kjo është e vetmja mënyrë që shqiptarët të kenë sistemin profesional dhe të paanshëm të drejtësisë që meritojnë, dhe të ecin përpara drejt integrimit në BE”, shkruan ambasada e SHBA në Tiranë.

Disa çaste pas publikimit të deklaratës së ambasadës amerikane, kryediplomatja e SHBA në vend znj. Yuri Kim i bëri jehonë thirrjes, duke shkruar se “Çështje të rëndësishme shpesh shoqërohen me fushata të shtrenjta ku hidhen dyshime dhe shkaktohet konfuzion, për të blerë ndikim, për të mohuar të vërtetën, për t’i shpëtuar drejtësisë. Le të jemi të qartë: kjo lidhet me dënimin e kriminelëve të njohur – asgjë më shumë, asgjë më pak. Mbështesim fort SPAK dhe Policinë e Shtetit Shqiptar.”

Important cases are often accompanied by expensive campaigns to sow doubt & confusion, to buy influence, to deny the truth, to escape justice. Let’s be clear: this is about punishing known criminals – nothing more, nothing less. We strongly support SPAK & ASP. https://t.co/OVqXvFeo4E

— Ambassador Yuri Kim (@USAmbAlbania) August 7, 2020

Lexoni gjithashtu: 

Sekuestrohet ish-hotel “Vollga” në qytetin e Durrësit, ishte në pronësi të Emiljano Shullazit