Meta e Basha përkujtojnë ekzekutimin nga diktatura të poetit disident Havzi Nela

Presidenti Ilir Meta dhe kryetari i Partisë Demokratike Lulzim Basha përkujtuan të hënën 32-vjetorin e ekzekutimit nga diktatura të poetit Havzi Nela.

Përmes një postimi në Facebook Meta e konsideroi Nelën “poet disident” dhe “martir të fjalës së lirë”. Ai theksoi se “litari i xhelatëve që i shteri atij frymën nuk do mundë kurrë ta vrasë demokracinë, dinjitetin dhe të drejtat e njeriut si ëndërr e çdo shqiptari për një Shqipëri si e gjithë Evropa”.

Presidenti citoi më tej vargje të poezisë “O liri, o vdekje”.

Edhe kryetari i PD-së Basha citoi disa vargje të poezive të Nelës në një postim në Twitter, teksa e cilësoi atë “poet të pavdekësisë”.

“Thoni: Desh, kërkoi lirinë,
Si skifter në fluturim,
Provoi prangat, t’errtë qelinë,
Për të mjerët, lëshoi kushtrim.
Thoni se: E qorroi terri
Thoni: Dielli nuk u ngrohu.
Thoni se: E trishtoi tmerri
E të shtypunit i tha: Çohu!”
Havzi Nela – Poeti i pavdeksisë pic.twitter.com/Vsdg1odBtz

— Lulzim Basha (@lulzimbasha_al) August 10, 2020

Havzi Nela, lindur në Kukës më 20 shkurt 1934, ishte një mësues i cili u përndoq vazhdimisht nga diktatura komuniste për shkak të pikëpamjeve të tij kundra sistemit.

Fillimisht u dëbua nga Mati, ku ushtronte profesionin për shkak se u lexonte nxënësve poema dhe poezi jo të përshtatshme për regjimin, më pas u përndoq duke u mbajtur në mbikëqyrje e duke u pyetur vazhdimisht për vite me radhë.

Në vitin 1967 u përpoq të arratisej nga vendi bashkë me të shoqen, Lavdie Nela, mirëpo u arrestua nga ushtarët jugosllavë dhe u soll në Shqipëri ku u dënua me dy dënime njëri-pas-tjetrin fillimisht 15 vite burg e më pas me 8 vite të tjera.

Regjimi e liroi më 19 dhjetor 1986 ndërsa vetëm pak vite më vonë për shkak të veprimtarisë së tij letrare ai u dënua sërish, kësaj here më 24 qershor 1988 Gjykata e Lartë e dënoi atë me vdekje dhe nuk pranoi kërkesat për faljen e jetës, kërkesa që u refuzuan edhe nga kryetari i Presidiumit të Kuvendit Popullor, Ramiz Alia.

Nela u var në litar më 10 gusht 1988 në qendër të Kukësit, përpara shkollës që sot mban emrin e tij.

Ekzekutimi i Nelës mbetet një nga veprat më të rënda të regjimit diktatorial në Shqipëri, pasi ndodh në një kohë kur pjesa më e madhe e shteteve komuniste kishin nisur procese të demokratizimit të vendit.