Në kërkim nga Kanadaja, Interpol Tirana ekstradon 39-vjeçarin shqiptar

Interpol Tirana në bashkëpunim me shërbimet partnere ka kryer ekstradimin drejt Kanadasë të një 39-vjeçari. Sipas Policisë, shtetasi me iniciale E.C ishte shpallur në kërkim ndërkombëtar nga autoritetet kanadeze pasi në vitin 2014 duke drejtuar mjetin tip kamion ka përplasur për vdekje një shtetase.

Gjykata e British Columbia në Kanada, më datë më 25 qershor të 2018 kishte vendosur masën e sigurisë “Arrest në burg”, për shtetasin shqiptar E. K.

Arrestimi i 39-vjeçarit në Shqipëri është kryer në Korrik të 2019, ndërsa mbrëmjen e kaluar është ekstraduar drejt Kanadasë, aty ku do të përballet me akuzën e ngritur nga drejtësia vendase.

Policia shton se autoritetet gjyqësore kanë dhënë miratimin për ekstradimin nga Republika e Shqipërisë në drejtim të Kanadasë të 39-vjeçarit, i cili iu dorëzua oficerëve të policisë kanadeze në Aeroportin “Nënë Tereza” në Rinas.