Kandidatja për kreun e FRPD-së: Zgjedhjet me probleme, s’kishim listën e votuesve

Anëtarja e Këshillit Kombëtar të Partisë Demokratike, Barbara Doda e cila garoi për kreun e FRPD-së, thotë se procesi i votimit në këtë forum kishte parregullsi.

Në një intervistë për Euronews Albania, Doda u shpreh se asnjë nga kandidatët nuk kishte listën e anëtarësisë.

Një tjetër problem sipas saj, ishte dhe fakti që një pjesë e strukturave nuk kishin drejtues nëpër degë dhe rrethe.

“Ajo që ka ndodhur, tregon që Partia Demokratike është ende në proces demokratizimi. Nëse dikush mendon që çdo gjë u arrit me foltoren, e ka shumë gabim, ky është një proces i gjatë. Mendoj që Partia Demokratike duhet të ketë një tjetër standard. Standardi i PD-së është që në fillim të garës të ketë lista, ne i kemi marrë në fund.

Ishte një proces i ri në PD, anëtarësim dhe rianëtarësim, kjo krijoi vonesa dhe vështirësi për ne kandidatët e tjerë. Listat janë parësore dhe jepen në ditën që ti garon, ne nuk i patëm. Kishim problemin që një pjesë e strukturave nuk kishin drejtues nëpër degë dhe rrethe. Këto probleme u pasqyruan në garën tonë”, theksoi ajo.

Besart Xhaferri u zgjodh në krye të Forumit Rinor të Partisë Demokratike, pasi arriti të sigurojë 55.5% të votave, në zgjedhjet që u zhvilluan më 1 tetor.

LEXONI GJITHASHTU

• Evi Kokalari: Në zgjedhjet për kreun e FRPD-së është bërë masakër
• Besart Xhaferri zgjidhet kreu i ri i FRPD-së