Grabiten bizhuteri me vlerë 1 miliard euro nga muzeu i Dresdenit

Grabitësit kanë hyrë në një prej muzeve më të vjetër në Evropë dhe kanë marrë bizhuteri dhe artefakte me një vlerë prej rreth 1 miliard euro, pjesë e koleksionit Kasaforta e Gjelbër.

Në një deklaratë për shtyp, policia ka thënë se diamantet e vjedhur janë tejet të çmuar dhe se kanë shpallur në kërkim dy persona.

Policia nuk përjashton mundësinë e përfshirjes edhe nga persona të tjerë.  

Nga kamerat e sigurisë vërehen grabitësit duke hyrë nga dritarja. Më pas, ata kanë thyer xhamin mbrojtës për të marrë sendet me vlerë dhe kanë dalë nga dritarja e pasme.

Grabitësit kanë arritur të marrin diamante, rubin dhe smerald nga shekulli i 18-të, ka konfirmuar policia e Dresdenit dhe zyrtarë të muzeut.

Ngjarja është cilësuar si grabitja më e madhe që pas Luftës së Dytë Botërore.

Policia ka rrethuar Muzeun e Dresdenit i cili ka një ndër koleksionet më të mëdha të bizhuterive në Evropë.

Muzeu ka konfirmuar se grabitja është kryer në pjesën historike të koleksionit “Kasaforta e Gjelbër”, por nuk ka dhënë informacione të mëtejshme lidhur me ngjarjen.

“Kasaforta e Gjelbër” është krijuar në Shekullin e 18-të nga “Augusti i Fortë”, i cili njihet edhe si “I Zgjedhuri i Saksonisë” dhe më tej Mbreti i Polonisë.

Grabitësit nuk kanë arritur dot të marrin thesarin më të famshëm në muze, “Diamantin e Gjelbër” 41-karatsh të Dresdenit, i cili është aktualisht i huazuar nga Muzeu i Artit Metropolitan të Nju Jorkut.

Michael Kretschmer, kryeministri i Republikës Federale të Saksonisë ka thënë se: “Bizhuteritë në Kasafortën e Gjelbër dhe Pallati ku ato ndodheshin janë ndërtuar me mund nga populli i Saksonisë, për shekuj me radhë,” duke shtuar se grabitja ishte një goditje e madhe për të gjithë vendin.