Italia zgjedh krerët e parlamentit, kontestohen Ignazio La Russa dhe Lorenzo Fontana

Të enjten në Itali u mbajt sesioni i parë parlamentar i legjislaturës së dalë nga zgjedhjet e muajit të kaluar, të cilat u fituan nga koalicioni i djathtëQëllimi i seancës ishte zgjedhja e kryetarëve të dhomës së ulët dhe asaj të lartë të Parlamentit.

Kështu, Ignazio La Russa, anëtar i partisë Vëllezërit e Italisë, u emërua kryetari i ri i Senatit.

Emërimi i tij hasi kritika të shumta. Së pari sepse shumica e senatorëve të partisë aleate Forza Italia nuk votuan për atë; dhe, së dyti, sepse La Russa njihet si admirues i Benito Mussolinit.

Duhet të kujtojmë se Forza Italia e Silvio Berlusconit, së bashku me Ligën e Matteo Salvinit janë pjesë e koalicionit qeverisës të udhëhequr nga Giorgia Meloni, që nuk është caktuar ende kryeministre.

Ndërkohë, të premten, Lorenzo Fontana, anëtar i Ligës, u caktua kryetar i dhomës së ulët të Parlamentit.

Por sërish, ky emërim u kritikua nga shumë deputetë që brenda sallës së Parlamentit ngritën një baner ku thuhej: “Nuk duam një kryetar Putinian dhe homofobik”.

Mbetet për t’u parë se si këto ndasi do të reflektohen në qeverinë që pritet të betohet, pasi konsultat politike të nisin javën e ardhshme.

Gjithashtu do të shohim nëse Giorgia Meloni do të mund të mbajë të bashkuar koalicionin.

LEXONI GJITHASHTU:

• Aksident në Itali, humb jetën 23-vjeçari shqiptar, shpëton për mrekulli vajza e tij
• Rajoni i Italisë ku turistët paguhen për të ardhur, me një kusht të vetëm