A do të bashkohet Partia Demokratike? Flet Gazmend Oketa

Ish-ministri i Mbrojtjes, Gazmend Oketa shprehet optimist se do të arrihet bashkimi i Partisë Demokratike.

Në një intervistë për Euronews Albania, Oketa deklaroi se nëse opozitës do t’i bashkohet elektorati gri pas bashkimit, kjo është një çështje për t’u analizuar.

Oketa nënvizoi se shumica e anëtarësisë në PD ka zgjedhur në krye Sali Berishën dhe ky fakt duhet të pranohet nga të gjithë.

“Unë besoj se një gjë e tillë do të ndodhë. Pastaj, se cila do të jetë perspektiva pasi ky bashkim të ndodhë, nëse do ky bashkim do të maksimalizojë jo vetëm energjitë brenda Partisë Demokratike, por edhe jashtë grupimit politik, do të bëjë të mundur që opozitës shqiptare t’i bashkohet pjesa gri, është një çështje që duhet të analizohet më pas.

Unë sot nuk mund të mohoj që Partia Demokratike ndodhet para një fakti të kryer, që shumica e anëtarësisë kërkoi si kryetar të saj, të kishte zotin Berisha. Këtu diskutimi duhet të mbarojë, është një fakt që duhet ta pranojmë”, theksoi ai.

Edi Paloka dhe Gazment Bardhi janë dy të mandatuarit e dy grupimeve për të negociuar mundësitë dhe rrugët për bashkimin dhe daljen me kandidatë të përbashkët në zgjedhjet e ardhshme lokale.

Të dy qëndruan në takim kokë më kokë për rreth 90 minuta në një nga lokalet e Tiranës këtë të martë.

Pas takimit, të dy refuzuan të jepnin detaje rreth asaj që kishin biseduar, por deklaruan se do të ketë një takim të dytë.

LEXONI GJITHASHTU

• Oketa për takimin Bardhi-Paloka: Ngjasonte sikur do bënin pazare individuale
• Përpjekjet për bashkimin e PD, çfarë deklaruan Paloka dhe Bardhi pas takimit
• ‘Do vërshojmë në sheshe’, Berisha: Tirana në krye dhe beteja fillon