Kremlini konfirmon se Putin dhe Lukashenko do të takohen në javët në vijim

Kur në Bjellorusi nuk kanë të ndalur protestat kundër presidentit Lukashenko dhe kur raportet me BE janë të tensionuara, Kremlini konfirmon se presidenti rus Putin dhe homologu Lukashenko  pritet të takohen në Moskë në javët në vijim.

Gjatë telefonatës që zhvilluan gjatë të dielës Kremlini bën me dije se dy liderët ranë dakord të takohen për të diskutuar për forcimin e raporteve dypalëshe dhe zgjerimin e bashkëpunimit.

Një takim i tillë vjen kur BE vazhdimisht bën thirrje që në vend të zhvillohen zgjedhje të lira dhe të drejta duke mbështetur protestuesit, të cilët i cilësojnë zgjedhjet presidenciale të 9 gushtit të manipuluara.

Dy ditë më parë, përfaqësuesi i Lartë i BE-së pas takimit të ministrave të Jashtëm në Berlin, Joseph Borrell bëri me dije se ndaj zyrtarëve bjellorusë do të ndërmerren sanksione duke i cilësuar si persona përgjegjës për manipulimin e zgjedhjeve dhe dhunë ndaj protestuesve.

Presidenti Lukashenko i ka cilësuar vazhdimisht protestuesit e opozitës kukulla të Perëndimit. Pak ditë më parë shefi i Kremlinit, Vladimir Putin theksoi se forcat ruse të sigurisë do të ndërhyjnë në Bjellorusi nëse opozita fillon të marrë ndërtesat shtetërore, bankat dhe nisë të shkaktojë rrëmujë.