Epidemiologu Alimehmeti: Efektiviteti i vaksinës anti-COVID nuk do jetë më shumë se 50%

Epidemiologu Ilir Alimehmeti tha për Euronews Albania, se fakti që vaksina anti-COVID duhet të prodhohet për një kohë shumë më të shkurtër nga mesatarja e kohës që i duhet një vaksine të jetë gati në kushte normale, do të bëjë që efektiviteti i saj të mos jetë 100 për qind, por vetëm 50.

Nga ana tjetër sipas tij, gara mes vendeve për të prenotuar një vaksinë e cila ende nuk është gati dhe ende nuk ka rezultuar e suksesshme në të gjitha provat klinike, duket një nismë që mbart me vete riskun e saj.

“Bota kërkoi që vaksina të bëhej shumë shpejt. Vaksina do 10-15 vjet dhe fakti që ne e kërkuar për 10-15 muaj sigurisht që do ketë ulje.

 Nuk do ketë efektivitet 100 për qind, por diku tek 50 për qind. virusi jep mutacione ndaj vaksina mund të prodhohet vit për vit.

Disa shtete duket sikur po bëjnë investime në një gropë ku pallati nuk do të ndërtohet kurrë. Rezervojnë diçka që ndoshta nuk funksionon.

Sigurisht, e marrin më lirë njësoj si një apartament i prenotuar në gropë dhe më shpejt se të tjerët. Por nuk është i sigurt suksesi i vaksinës”, tha epidemiologu.

Epidemiologu e cilësoi pozitiv trendin në ulje të numrit të rasteve me COVID-19 në vendin tonë, që sipas tij është një prirje që pritej për gjysmën e dytë të muajit gusht.

Z. Alimehmeti tha se ulja e përqindjes së infeksionit nga 19 për qind, gradualisht në 14, 12. 6 dhe së fundmi 10 për qind është lajm i mirë, pasi është dëshmi e faktit se rastet me virusin janë gjurmuar dhe vatrat e infeksionit janë shuar.

“Lajm tjetër pozitiv është fakti se prej disa ditësh numri i rasteve të rejave me COVID-19 është më i vogël se numri i të shëruarve. Edhe pse fatkeqësisht në asnjë vend të botës hetimi epidemiologjik nuk mund t’i zbulojë të gjitha rastet”, u shpreh epidemiologu.