Kryeministri i Irakut deklaron se do të japë dorëheqjen, teksa përshkallëzohen protestat në vend

Kryeministri irakian thotë se do të lerë detyrën pas përgjakjes së protestave në vend.

Adel Abdul-Mahdi do të paraqesë dorëheqjen e tij në parlamentin irakian për t’i hapur rrugën deputetëve të zgjedhin një qeveri të re, thuhej në një deklaratë zyrtare nga zyra e tij.

Vendimi i tij ka ardhur si pasojë përshkallëzimit të protestave të fundit kundër qeverisë, ku 400 persona janë vrarë nga forcat e sigurisë.

Abdul-Mahdi tha në Twitter se vendimi i tij ka ardhur pas thirrjes për ndryshim të udhëheqjes në vend të bërë nga Kleriku i madh i myslimanëve Shiit në Irak, Ayatollah Ali al-Sistani.

“Duke ju përgjigjur kësaj thirrje si dhe për të lehtësuar e për të përshpejtuar zbatimin e saj sa më parë, do të paraqis tek Këshilli i Përfaqësuesve, një letër zyrtare ku do të kërkoj dorëheqjen e qeverisë aktuale” është shprehur Adel Abdul-Mahdi.

“Këshilli i Përfaqësuesve, nga ku ka dalë dhe qeveria aktuale, është i ftuar të shqyrtojë mundësitë që do t’i parashtrohen dhe të veprojë  në sajë të interesave të Irakut për të ruajtur gjakun e popullit tonë dhe për të parandaluar rënien e tij në një cikël të vazhdueshëm dhune, kaosi dhe shkatërrimi”.