Fëmijët në mbarë Evropën kthehen në klasa me libra dhe maska

Fëmijët në mbarë Evropën janë kthyer të martën në shkolla, duke mbajtur me vete përveç librave dhe fletoreve edhe maskat për t’u mbrojtur nga epidemia e COVID-19. Të vegjëlve do t’u duhet të përshtaten me rregullat e reja, që përfshijnë dezinfektimin e vazhdueshëm të duarve, orarin e kufizuar të argëtimit dhe distancimin social.

Disa dhjetëra milionë nxënës u kthyen ditën e martë në shkolla në shtete si Franca, Spanja dhe Rusia, me çantat e shpinës të mbushura me fletore e libra, por edhe me maska për t’u mbrojtur nga përhapja e coronavirusit.

Pastrimi i vazhdueshëm i duarve, distancimi social dhe koha e kufizuar për lojëra do të jenë normaliteti i ri për këta fëmijë, ndërkohë që në vende të tjera të Evropës njerëzit po përpiqen të gjejnë mënyra për të dërguar fëmijët në klasë, të sigurt dhe me gjendjen ekonomike funksionale.

Por kjo vjen në një kohë kur infeksionet po rriten sërish në mbarë kontinentin dhe ka shqetësime se rikthimi në shkolla e zyra, gripi i vjeshtës dhe rritja e vdekshmërisë në dimër mund të çojnë në një valë të dytë pandemie.

Vende të ndryshme po ndërmarrin qasje të ndryshme për të ulur infeksionet në shkolla. 17 rajonet e Spanjës janë secila përgjegjëse për planin e kthimit në shkollë, edhe pse duhet të ndjekin rregullat kombëtar, si mbajtja e maskës për fëmijët mbi 6 vjeç.

Në Rusi, nxënësit u kthyen në shkolla në një kohë kur infektimet me coronavirus kanë kaluar 1 milion raste.

Qeveria franceze deklaroi se kriza nuk duhet t’i lërë qytetarët në pritje, ndërsa kryeministri britanik Boris Johnson tha se është jetike që shkollat në Angli të rihapen këtë javë.

Në kulmin e epidemisë së coronavirusit, që u shoqërua me bllokadën globale, rreth 1.5 miliard fëmijë u prekën nga mbyllja e shkollave.