Bjellorusi, Tsikhanouskaya i bën thirrje OKB të vendosë sanksione kundër regjimit të Lukashenkos

Kundërshtarja kryesore në zgjedhjet e kontestuara të Bjellorusisë i ka bërë thirrje komunitetit ndërkombëtar që të vendosë sanksione “ndaj individëve që kanë kryer shkelje gjatë zgjedhjeve dhe krime kundër njerëzimit” dhe të marrin masa të tjera për të ndaluar dhunën kundër protestuesve.

Sviatlana Tsikhanouskaya i tha Këshillit të Sigurisë së Kombeve të Bashkuara se Alexander Lukashenko “është përpjekur të vjedhë votat e popullit” dhe “nuk përfaqëson më Bjellorusinë”.

“Një komb nuk duhet të mbahet peng nga etja e një individi për pushtet dhe kjo nuk do të ndodhë”, tha ajo. “Bjellorusët janë zgjuar. Nuk ka më kthim pas.”

Tsikhanouskaya, e cila shkoi në Lituani pas presioneve nga autoritetet bjelloruse pas zgjedhjeve, e ka cilësuar Lukashenkon si “pengesa e vetme” për të plotësuar kërkesat e popullit: dhënia fund e dhunës dhe kërcënimeve nga regjimi, lirimi i menjëhershëm i të gjithë të burgosurve politik dhe zgjedhje të lira e të ndershme.

Lukashenko, i cili ka udhëhequr kombin me 9.5 milionë banorë me një grusht të hekurt për 26 vite, nuk i njeh kërkesat e protestuesve që kanë rreth 4 javë që tubojnë kundër rezultatit të zgjedhjeve që i dhanë atij mandatin e gjashtë me 80 për qind të votave.

Në ditët e para, policia ka ndaluar rreth 7 mijë persona dhe ka përdorur dhunë mbi qindra çka ka sjellë kritika të mëdha nga ndërkombëtarët. Që nga ajo kohë, qeveria ka ndërruar strategji duke tentuar t’i ndalë protestat përmes kërcënimeve dhe arrestimeve selektive të protestuesve dhe aktivistëve.

Lexoni gjithashtu: 

Lukashenko akuzon të huajt, “Protestat në Bjellorusi po influencohen nga fqinjët tanë”

Lukashenko paralajmëron gjakderdhje nëse opozita vjen në pushtet

Kriza në Bjellorusi, ministri i Jashtëm: Parandaluam përpjekjet për një revolucion të mundshëm