Të majtët fitojnë zgjedhjet në Danimarkë

Socialdemokratët e udhëhequr nga kryeministrja aktuale daneze Mette Frederiksen fituan shumicën e votave në zgjedhjet parlamentare të mbajtura në atë vend.

Kështu Frederiksen iu dha mandati për të formuar një qeveri të re, pavarësisht kritikave për centralizimin e pushtetit dhe politikën e diskutueshme që ajo udhëhoqi gjatë pandemisë së coronavirusit, raporton Reuters.

“Faleminderit të gjithë danezëve që na besuan votat e tyre, është një nder i madh. Edhe pse shumë dyshuan tek ne”, tha Frederiksen mbrëmë.

Në një natë tejet të pasigurt paszgjedhore, rifitorja e bllokut të majtë, të kryesuar nga socialdemokratët, nuk ishte e sigurt deri në orët e para të mëngjesit.

Në mbledhjen e re të parlamentit socialdemokratët do të jenë më të shumtët, pasi sipas rezultateve paraprake kanë fituar 27.5 për qind të votave.

Blloku i partive me prirje të majtë do të ketë 87 deputetë në parlamentin me 179 vende, i cili, me mbështetjen e pritshme të deputetëve nga Ishujt Faroe dhe Groenlanda, të cilët shpesh zgjedhin kandidatët e majtë, do t’u jepte atyre një shumicë në asamble.

LEXONI GJITHASHTU:

• Sot zgjedhjet parlamentare në Danimarkë 
• Danimarka në zgjedhje, kontraste në koalicionin qeverisës dhe frikë nga radikalët