Përzgjedhja e anëtarëve të KQZ, opozita e bashkuar cakton Oerd Bylykbashin në Komisionin Parlamentar

Opozita e bashkuar ka zgjedhur Oerd Bylykbashin si përfaqësues në Komisionin e Posaçëm Parlamentar për zgjedhjen e anëtarëve të Komisionit Qendror të Zgjedhjeve.

Kështu, opozita zgjodhi t’i përgjigjet brenda afatit letrës së kryeparlamentarit, Gramoz Ruçi, i cili një ditë më parë kërkoi ngritjen e komisionit të posaçëm që do të zgjedhë KQZ-në e re.

Sekretari i përgjithshëm i Partisë Demokratike, Gazmend Bardhi, njoftoi zyrtarizimin e Bylykbashit si përfaqësues të opozitës.

“Kemi autorizuar si përfaqësues me cilësinë e të dërguarit të posaçëm pranë Komisionit Parlamentar, që do të marrë pjesë në procedurën e shqyrtimit dhe përzgjedhjes së kandidaturave për organet drejtuese të KQZ-së, z. Oerd Bylykbashi, anëtar i Këshillit Politik të ngritur me marrëveshjen politike të 14 Janarit 2020’, thuhet në letrën dërguar kryeparlementarit Ruçi.

Në bazë të ndryshimeve të reja në Kodin Zgjedhor, Komisioni Qendror i Zgjedhjeve do të ketë 12 anëtarë dhe përbëhet nga 3 hallka: Komisioneri Shtetëror i Zgjedhjeve, Rregullatori dhe Komisioni i Ankimeve dhe Sanksioneve.

Kësisoj, brenda 19 tetorit do të jenë përzgjedhur të gjithë anëtarët e KQZ-së në bashkëpunim me Partinë Demokratike, e cila tashmë e ka një përfaqësues në komision ku do të përzgjedhë anëtarët e tri hallkave të reja të administrimit zgjedhor.

Nga opozita parlamentare anëtarë të këtij komisioni do të jenë Myslim Murrizi dhe Edmond Stojku, ndërsa kryetari i tij do të jetë Damian Gjiknuri. Ndërkohë që ende nuk janë zyrtarizuar dy emrat e tjerë nga mazhoranca.

Lexoni gjithashtu:

Ruçi letër krerëve të grupeve parlamentare për KQZ e re: Afat deri më 9 shtator për të propozuar kandidatët

Kristaq Kume tregon 2 sfidat e KQZ së re: Ndryshimet në kodin zgjedhor të kalojnë nga Këshilli Politik

Nis gara për KQZ, Kuvendi publikon thirrjen, partitë fillojnë punën për emrat

Botohen ndryshimet e Kodit Zgjedhor, sfida e ardhshme KQZ-ja e re