SHBA-Rusi në bisedime, Kremlini: Së shpejti në tryezë për marrëveshjen bërthamore

Shtetet e Bashkuara dhe Rusia do të kthehen në bisedime “së shpejti” në kuadër të komisionit dypalësh për kontrollin e zbatimit të traktatit “New Start”, për reduktimin e armatimeve bërthamore.

Lajmin e ka bërë të ditur zëdhënësja e Ministrisë së Jashtme ruse, Maria Zakharova. Bëhet fjalë për takimin e parë që nga nisja e agresionit ushtarak të Moskës në Ukrainë.

Traktati “New Start”, që skadon në vitin 2026, është e vetmja marrëveshje për reduktimin e arsenaleve bërthamore ende në fuqi mes Rusisë dhe Amerikës.

Një ditë më parë, këshilltari amerikan për sigurinë kombëtare, Jake Sullivan konfirmoi mbajtjen hapur të kanaleve të komunikimit mes Uashingtonit dhe Moskës.

Duke folur nga Nju Jorkut, Sullivan deklaroi se ishte në interesin e Shteteve të Bashkuara për të mbajtur gjallë kontaktet me Kremlinin.

“Wall Street Journal” raportoi se vetë Sullivan kishte zhvilluar bisedime me homologun rus Nikolai Patrushev dhe zyrtarë të tjerë rus në muajt e fundit.

Sipas burimeve të gazetës, ata kanë diskutuar për gjetjen e mënyrave për të parandaluar rrezikun e një përshkallëzimi bërthamor të luftës në Ukrainë.

LEXONI GJITHASHTU:

• SHBA-Rusia po flasin sërish pas muajsh të tërë – por për çfarë dhe pse kaq shpesh?
• Marrëveshje SHBA-Rusi për shkëmbimin e të burgosurve