Kryeministri Edi Rama kritika LSI-së: Jepte patenta në këmbim të votës

Kryeministri i Shqipërisë, Edi Rama ka sulmuar Lëvizjen Socialiste për Integrim se në kohën kur ishte në krye të Drejtorisë së Patentave i ka shpërndarë lejet e drejtimit sikur të ishin tesera partie, e kjo sipas shefit të qeverisë kundrejt votës ndaj LSI.

 “Jepeshin patentat si tesera partie. LSI-ja patentat i kishte tesera partie. Jepeshin patenta për t’u bërë votues i LSI. Nuk merrej kartën e partisë, merrje patentën, domethënë leje për të vrarë njerëz, për të marrë në qafë votuesit e vet edhe për të marrë në qafë kalimtarët. Kjo gjë ka ndryshuar rrënjësisht”, tha ai.

Gjatë inspektimit të zyrave të Drejtorisë Rajonale e Shërbimeve të Transportit Rrugor në Shkodër, kryeministri nuk la pa kritikuar as kreun e Partisë Demokratike, Lulzim Basha.

 “Sulmi i vazhdueshëm i organizuar dhe i udhëhequr nga Partia Demokratike kundër Drejtorisë të Shërbimeve të Trnasportit Rrugor, bazohet tek fjala po investojmë për luks, për fasada. Sepse konsiderojnë luks një mjedis ku njeriu hyn e ndihet njeri. Stallat që kishin i konsideronin të mjaftueshme për njerëzit”, tha Rama.

Kreu i ekzekutivit zhvilloi këtë të enjte disa insepktime në qarkun e Shkodrës dhe Lezhës.