Agim Nesho për marrëveshjen Kosovë-Serbi: SHBA në esencë nuk zgjidhi asgjë, çdo gjë ia la Europës

Ish-ambasadori i Shqipërisë në Organizatën e Kombeve të Bashkuara, Agim Nesho, komentoi marrëveshjen e nënshkruar mes Kosovës dhe Serbisë më 4 shtator në Shtëpinë e Bardhë.

Ai tha në Euronews Albania se nënshkrimi i marrëveshjes u shfrytëzua për fitoren në rrafshin e brendshëm dhe të jashtëm të administratës Trump, e cila synon të fitojë një mandat të dytë në zgjedhjet presidenciale.

“Në fakt e gjithë marrëveshja që ndodhi në Uashtington midis Serbisë dhe Kosovës, kishte lajtmotivin kryesor që t’i shërbente politikës së Trump për një fitore në politikën e jashtme. Në këtë kuptim, kjo është pika më e nxehtë dhe e detyrueshme që i solli fitoren administratës Trump. Nuk ishte thjesht marrëveshje, por marrëveshja ishte një kërkesë e përsëritur e liderëve të Ballkanit për të pasur ndërmjetësim të SHBA.

Kompromisi ishte i tillë, prandaj kjo ishte një fitore e administratës, e cila pasi arriti kompromisin midis izraelit dhe Emirateve të Bashkuara, kërkoi që një vend tjetër mysliman, ashtu siç u shpreh edhe në letrën e nënshkruar nga presidenti Trump të bënte një njohje të mëtejshme. Pse është një fitore për politikën e administratës së Trump? Në rrafshin e brendshëm është një fitore për arsye sepse sensibilizon  pjesën e elektoratit të gjerë evangjelistë, e cila e sheh si një detyrë përkrahjen e Izraelit në Lindjen e Mesme. Nga ana tjetër, Trump ka qenë i kritikuar për politikën e tij të tërheqjes nga Lindja e Mesme”, tha Nesho.

Zoti Nesho u shpreh se Kosova në këtë marrëveshje fitoi thjesht një njohje më tepër, ndërsa nënvizoni faktin se SHBA nuk zgjidhi asgjë në esencën e konfliktit mes Prishtinës dhe Beogradit.

“Në thelb politika amerikane është ajo që dominon dhe nuk kërkon mirëkuptimin e forcave të tjera, siç është një kompromis i deritanishëm me BE për të ndarë ato vlera e përgjithshme në politikën e jashtme, ka nuanca në këtë.  Kemi dhe interesa të tjera të fuqive si Turqia dhe Irani, që sigurisht e shikojmë me skepticizëm. Pse  u detyruan që Serbia dhe Kosova të pranojnë këtë gjë, sepse kjo ishte çelësi i artë që solli Kosovën dhe Serbinë në Uashington.  Ato e pranuan, sepse kërkonin që SHBA-të të ishin pjesëmarrës në zgjedhjen e të ashtuquajturit të konfliktit të ngrirë, që kishte midis Kosovës dhe Serbisë. Kosova dhe Serbia pranuan ndërmjetësimin e Uashingtoni, i cili e shfrytëzoi në mënyrë perfekte, në esencë nuk ndryshoi asnjë gjë, çdo gjë ia la Evropës, por arriti fitoren e madhe në politikën e brendshme dhe të jashtme para zgjedhjeve elektorale për presidentin Trump. Ajo që fitoi Kosova në këtë rast, ishte një njohje më tepër”, shtoi ai.

Lexoni gjithashtu:

Konflikti Izrael – Palestinë, çështje e pazgjidhur që vijon të shkaktojë debate

Palestina reagon ashpër ndaj vendimit të Kosovës dhe Serbisë për të hapur ambasadë në Jerusalem

Stano: BE pret që Kosova e Serbia të jenë në një linjë me BE-në në lidhje me Jeruzalemin 

Netanyahu publikon mesazhin e Vjosa Osmanit: Shteti i parë mysliman që do të hapë ambasadën në Jerusalem