Stacioni Sizmik i Durrësit nuk e regjistroi tërmetin e 26 nëntorit, mungoi energjia elektrike

Mëngjesin e 26 nëntorit Stacioni Sizmik në Durrës nuk ka regjistruar të dhënat e aksonometrisë. Shkak për këtë është bërë mungesa e burimit rezervë të energjisë. Drejtori i Departamentit të Sizmologjisë, Rexhep Koçi tregon për Euronews Albania se stacioni i Durrësit nuk është i pajisur me inverter dhe bateri.

Shkëputja e energjisë elektrike dhe mungesa e burimit rezervë të kësaj energjie solli mospasjen e të dhënave aksonometrike nga tërmeti i 26 nëntorit në qytetin e Durrësit.

“Sa i përket mosfunksionimit të instrumentit të vendosur në Durrës ka të bëjë me parametrat që duhet të ishin prezentë se si ka qenë nxitimi në momentin e ngjarjes, që nuk e kemi matur dhe është parametër i rëndësishëm”, – thotë Koçi.

Ai shpreh shqetësimin se, edhe pse janë bërë kërkesa të vazhdueshme, stacionet e sizmologjisë në vendin tonë kanë mungesë të burimit rezervë të energjisë elektrike.

“Nga 20 stacione të natyrave të ndryshme që ekzistojnë në vendin tonë, kemi sot vetëm 5 që kanë inverter, edhe ato të pajisur me bateri që u ka skaduar afati 2-3 vjet”, – thotë Koçi.

Megjithatë parametrat e shkallës Rihter të tërmetit janë përcaktuar, harta e intensitetit të ballëve nuk është ende gati, për shkak të kushteve të departamentit sizmologjik në Shqipëri. Në epiqendër mendohet se tërmeti ka qene 8-9 ballë.

Sipas të dhënave, pas tërmetit të 26 nëntorit aktiviteti sizmik ka vazhduar dhe është në rënie nga dita në ditë.

51 vetë humbën jetën dhe qindra të tjerë u plagosën pas tërmetit të fortë që tronditi vendin mëngjesin e 26 nëntorit, ndërsa mijëra banesa u shembën e shumë të tjera u bënë të pabanueshme pas goditjes së fortë 6,4 ballë.