Miqësore me Gjibraltarin, Kombëtarja shqiptare tjetër ndeshje testuese në muajin nëntor

Kombëtarja e Shqipërisë do të zhvillojë një tjetër miqësore në muajin nëntor me përfaqësuesen e Gjibraltarit.

Federata Shqiptare e Futbollit ka zyrtarizuar arritjen e marrëveshjes, për organizimin e takimit në datën 11 nëntor.

Kjo është hera e parë që skuadra përfaqësuese ndeshet me ekipin e Gjiibraltarit.

Ky takim do të luhet në orën 19:00 në “Elbasan Arena” dhe do i shërbejë trajnerit Edoardo Reja për të testuar skuadrën për dy takimet zyrtare të Ligës së Kombeve që do të luhen në datat 15 nëntor dhe 18 nëntor, me Kazakistanin dhe Bjellorusinë në Shqipëri.

Në muajin tetor, skuadra kuqezi ka njoftuar më herët se do të luajë një ndeshje miqësore me ekipin e Armenisë, para takimeve të Ligës së Kombeve. Objektivi i skuadrës kombëtare mbetet vendi i parë në grupin katër të Ligës C, në mënyrë që në shortin për kualifikueset e Kampionatit Botëror të ngjitet një vazo më lart.