Rama mbledh drejtuesit e qarqeve dy javë pas marrjes së detyrës

Kryetari i Partisë Socialiste, Edi Rama prej më shumë se 60 minutash po zhvillon një mbledhje me drejtuesit politikë të 11 qarqeve të vendit që do të drejtojnë fushatën për zgjedhjet e ardhshme parlamentare. Vetë Rama është emëruar drejtues i Qarkut të Durrësit. Ndryshe nga zgjedhjet e fundit në vitin 2017, kryeministri pritet të garojë për deputet pikërisht në qytetin bregdetar.

Takimi i sotëm vjen dy javë pas marrjes së detyrës, ku PS ngarkoi Elisa Spiropalin në Tiranë, Taulant Ballën në Elbasan, Niko Peleshin në Korçë, Damian Gjiknurin në Vlorë, Lindita Nikollën në  Lezhë, Ilir Beqjan në Shkodër, Safet Gjicin në Kukës, Gramoz Ruçin në  Fier, Bledi Çuçin në Gjirokastër dhe Olta Xhaçkën në Dibër për të udhëhequr fushatën.

Drejtuesit e qarqeve do të raportojnë për punën në terren dhe shqetësimet që kanë hasur në qark gjatë takimeve të para me elektoratin. Mbi shqetësimet dërrmuese të qytetarëve dhe elektoratit, pritet të PS të ndërtojë programin e ardhshëm politik.

Për zgjedhjet parlamentare të 25 prillit, kreu i PS i ka kërkuar grupit parlamentar që të punohet për të ruajtur numrin prej 74 mandate deputetësh për marrjen e një mandati të tretë qeverisës. PS ka parashikuar të zhvillojë takime të përjavshme me drejtuesit e qarqeve.