Fluksi te Spitali i Traumës, nga marsi deri sot janë kryer 520 operacione

Operacionet urgjente do të vijojnë të zhvillohen në Spitalin Universitar të Traumës, spital i cili gjatë pandemisë përballoi urgjencat kirurgjikale të spitalit universitar “Nënë Tereza” dhe “Shefqet Ndroqi.”

 “Spitali i Traumës do vijojë të mbulojë të gjithë urgjencat kirurgjikale, ndërkohë që në planin e vjeshtë-dimrit ne kemi kapacitete që tashmë i kemi të deklaruara, 500 shtretër të dedikuara covid në 4 spitale”, shtoi ministrja.

Spitali Universitar i Traumës, nga marsi e deri më sot ka pasur mbi 29 mijë urgjenca kirurgjikale. Në 1 muaj janë kryer rreth 520 operacione, ndërsa në ditë, aktualisht ka 30 raste të urgjencës përfshirë edhe traumën.

Për periudhën vjeshtë-dimër, ministrja e Shëndetësisë bëri me dije se po merren masa për të shtuar kapacitetet spitalore.

 “Në strategjinë tonë të vjeshtë-dimrit dhe në planin tonë aktual, ne jemi të përgatitur që të dyfishojmë kapacitetet e shtretërve për të përballuar jo vetëm Covid-19, por dhe për rastet që do të jenë me grip, pasi mund të ketë një mbivendosje dhe do të ketë edhe më shumë flukse në spitalet tona”, u shpreh ajo.

Manastirliu tha gjithashtu se në dy spitalet Covid-19 janë punësuar 150 profesionistë të shëndetit, të cilët po punojnë dhe janë duke u përgatitur për nevojën e strukturave të Covid 3 dhe Covid 4.