Përurimi i Huawei në Beograd, Brnabić: Nuk dëmton marrëveshjen me Uashingtonin

Huawei ka inauguruar Qendrën e Inovacioneve dhe Zhvillimeve në Beograd, në prezencën e kryeministres Ana Brnabić dhe ambasadorit kinez në vend, vetëm një javë pasi Serbia nënshkroi një marrëveshje në Uashington, që duket se kundërshton përfshirjen e Kinës në zhvillimin e rrjetit 5G në Serbi.

Sipas Brnabić, qendra do të ndihmojë në procesin e digjitalizimit në Serbi dhe se pavarësisht marrëveshjes së Uashingtonit, vendi po punon me Huawei edhe për të tjera teknologji që janë parakusht për vendosjen e 5G.

Për kryeministren serbe, ky bashkëpunim me kompaninë kineze nuk shkel marrëveshjen e nënshkruar në Uashington.

Marrëveshja e nënshkruar nga presidenti Aleksandar Vuçiç dhe më vete nga kryeministri i Kosovës Avdullah Hoti në Shtëpinë e Bardhë, angazhon Serbinë dhe Kosovën që të mos përdorin pajisje të siguruara nga “shitës jo të besuar” në rrjetet e tyre të telekomunikimit.

Megjithatë, Huawei ka një prezencë disa-vjeçare në Serbi, të cilën e ka zgjeruar përmes pjesëmarrjes në projekte të mëdha gjatë viteve të fundit.

Kompania ka një kontratë prej 150 milionë eurosh me kompaninë shtetërore Telekom Srbija për prokurimin e pajisjeve, shërbimeve dhe punimeve për modernizimin e rrjetit kabllor.