Hetime intensive për atentatin ndaj Preng Gjinit, shoqërohen disa persona

Policia shoqëroi disa persona pas atentatit të mbrëmshëm me tritol në Tiranë, ku i plagosur rëndë mbeti Preng Gjini dhe një kalimtar i rastit. Lënda plasëse dyshohet se u aktivizua në distancë ndërsa për të zbuluar autorët hetuesit janë fokusuar tek itinerari i shënjestrës së sulmit dhe qelizat telefonike.

Të paktën 300 gram lëndë plasëse shkaktoi shpërthimin e mbrëmshëm në automjetin me të cilin lëvizte Preng Gjini. Policia pret përgjigjen e laboratorit shkencor për të konfirmuar dyshimet se lënda e përdorur është e llojit c4.

Disa persona u shoqëruan në Tiranë por edhe në Rrëshen, vendlindjen e shënjestrës së sulmit, për shkak të konflikteve ndër vite që kanë shkaktuar disa viktima mes familjeve Gjini dhe Reçi.

Sipas burimeve, personi i fundit që Preng Gjini ka takuar para atentatit është nipi i tij, i cili gjithashtu është marrë në pyetje nga hetuesit ndërkohë që janë sekuestruar dhjetëra kamera sigurie.

Ekspertë të policisë kanë kryer edhe disa verifikime me antenat e valëve të celularëve në zonë për të identifikuar numrin që provokoi shpërthimin e tritolit.

Megjithëse gjendja e Preng Gjinit paraqitet e stabilizuar, mjeket e Spitalit të Traumës nuk japin garanci për jetën.

“Pacienti për momentin është në reanimacion, i ndjekur nga reanimatorët tanë. Ka pasur dëmtime në kokë, në sy, fytyrë dhe dëmtime në qafë”, tha Dritan Çela, shefi i kirurgjisë në Spitalin e Traumës.

Për atentatin ndaj Preng Gjinit pista kryesore që po heton policia është ajo e hakmarrjes. Më 12 gusht të vitit të kaluar në rreshen u ekzekutua edhe vëllai i tij Armando Gjini i skeduar për trafik heroine.

Lexoni gjithashtu: 

Atentati në Tiranë, Preng Gjini në gjendje kritike për jetën, dyshohet për hakmarrje

Shpërthimi me eksploziv, shënjestrës së atentatit një vit më parë i vranë vëllanë