Banka e Shqipërisë: Lirimi i masave kufizuese ndikoi pozitivisht në ekonomi duke reduktuar efektet e pandemisë

Banka e Shqipërisë vlerëson se lirimi i masave kufizuese ndikoi në rritjen e premisave që efekti i pandemisë në ekonominë Shqiptare të vijojë drejt reduktimit dhe gradualisht të vazhdojë një rimëkëmbje për periudhën e ardhshme.

Vlerësimi në fjalë u bë me dije nga Guvernatori i Bankës, Gent Sejko, gjatë një videokonference me përfaqësues të Fondit Monetar Ndërkombëtar (FMN) ku diskutua rreth ndikimit të pandemisë së COVID-19 në ekonomi dhe pritshmëritë për rimëkëmbje.

Zyra për shtyp e Bankës së Shqipërisë shpërndau për mediat vlerësimin që Sejko i bëri situatës.

Ai thuhet të jetë shprehur se ekonomia shqiptare “ka qenë nën efektin e fortë të pandemisë gjatë gjysmës së parë të vitit, e cila ka dhënë ndikimin e saj në konsum, në investime, në punësim dhe në borxhin publik”.

Megjithatë, sipas guvernatorit pandemia “e gjeti sektorin financiar dhe atë bankar të mirëkapitalizuar e likuid, dhe këto parametra kanë vijuar të ruhen të shëndetshëm”.

Në muajt mars-prill, për shkak të pandemisë së COVID-19, qeveria vendosi të kufizonte pothuajse të gjitha aktivitetet ekonomike dhe shoqërore duke ulur rreptësishtë lëvizjet tregtare.

Paralelisht Banka e Shqipërisë uli normën bazë të interesit dhe rriti emetimet e parasë për të rritur likuiditetin kjo me synim uljen e kostove të financimit dhe rritjen e masës monetare në ekonomi.

Në bashkëpunim me bankat e nivelit të dytë, u ndryshuan rregullat e kredive duke lehtësuar dhe shtyrë përkohësisht pagesat e kësteve për kreditorët në vështirësi financiare.

Sipas zyrës për shtyp të Bankës së Shqipërisë, FMN ka vlerësuar pozitivisht politikat e ndërmarra, politika që sipas saj “ofrojnë stimujt e nevojshëm për nxitjen e rritjes ekonomike dhe për kthimin e inflacionit në objektiv brenda vitit 2022”.

Fondi Monetar Ndërkombëtar deklaroi se rimëkëmbja e ekonomisë shqiptare në afatin e shkurtër mbetet sfiduese, si pasojë e efekteve negative nga tërmeti i vitit të kaluar, si dhe atyre të pandemisë globale COVID-19. Megjithatë, ekonomia shqiptare pritet të rifillojë rimëkëmbjen në vitin 2021.

Lexoni gjithashtu:

INSTAT: Shkëmbimet tregtare vijuan rënien edhe në muajin gusht

Kreu i shoqatës së fasonëve: Kërkojmë bashkërendim të punës me qeverinë për të përballuar krizën

Fasonët 4 kërkesa autoriteteve, në 3 muaj pandemi 130 milionë euro humbje