Rastet me Covid-19, Ministria e Arsimit në Kosovë bën thirrje për kujdes të shtuar në shkolla

Ministria e Arsimit dhe Shkencës në Kosovë u ka bërë thirrje drejtuesve të shkollave, mësimdhënësve, nxënësve, prindërve dhe kujdestarëve ligjorë për kujdes të shtuar në shkolla, në oborre dhe në afërsi të tyre.

Ky apel vjen në kuadër të rritjes së vigjilencës për frenimin e përhapjes së pandemisë së Covid-19.

Po ashtu, MASH, kërkon nga Drejtoritë Komunale të Arsimit (DKA) që të kujdesen për dezinfektimin e vazhdueshëm dhe mirëmbajtjen e shkollave sipas rekomandimeve të Ministrisë së Shëndetësisë.

Sipas ligjit për parandalimin dhe luftimin e pandemisë së Covid-19, Ministria e Shëndetësisë dhe Instituti Kombëtar i Shëndetësie Publike kanë kompetencë totale për të urdhëruar mbylljen e shkollave, në rast se është e nevojshme.

Me qëllim shmangien e këtij skenari, Ministria e Arsimit kërkon nga drejtoritë komunale të bëjnë vlerësime reale në terren dhe të evidentojnë shkolla që nuk përmbushin kushtet e zhvillimit të mësimit në klasa.

Në rast se do konstatohen shkolla, të cilat nuk kanë kushte të favorshme për ruajtjen e shëndetit të mësuesve dhe nxënësve, atëherë Ministria e Arsimit nuk e përjashton mundësinë që procesi mësimor të zhvillohet online.