Meta takon ambasadorët e BE-së: Marrëveshja e 5 qershorit të mos preket

Presidenti i Republikës, Ilir Meta ka zhvilluar sot një takim me ambasadorët e vendeve anëtare të Bashkimit Evropian. Takimi që vjen dy javë para publikimit të progres raportit të Komisionit Evropian ka qenë në kuadër të procesit të integrimit të Shqipërisë në BE.

Z. Meta ka deklaruar gjatë takimit se, respektimi i marrëveshjes politike të 5 qershorit do të jetë përcaktuese në hapjen e negociatave për anëtarësim dhe ka kërkuar që ajo të mos preket.

“Kënaqësi të takohesha sot me Ambasadorët e vendeve anëtare dhe Delegacionit të Bashkimit Europian në Tiranë, përpara publikimit të afërt të Raportit të Progresit për Shqipërinë. U përcolla disa nga shqetësimet, por dhe angazhimin dhe përkushtimin tim të vendosur, për plotësimin e 6 kushteve të BE, realizimi i të cilave do të jetë përcaktues në nisjen e negociatave të anëtarësimit gjatë Presidencës gjermane.

Theksova se garantimi i zgjedhjeve të lira dhe të ndershme është kyç për të ardhmen europiane të Shqipërisë. Paprekshmëria e frymës dhe germës së Marrëveshjes së 5 Qershorit është e vetmja mënyrë për të ecur në këtë drejtim”, shprehet presidenti mbi takimin.