Futbollisti i Milanit Zlatan Ibrahimoviç rezulton pozitiv me COVID-19

Futbollisti i Milanit, Zlatan Ibrahimoviç ka rezultuar pozitiv me COVID-19 dhe për këtë nuk do të luajë në ndeshjen e turit të tretë kualifikues për Europa League kundër Bodo/Glim.

Suedezi 38-vjeçar iu nënshtrua testit për koronavirus njësoj si e gjithë skuadra në momentin kur futbollisti tjetër, Leo Duarte rezultoi i infektuar.

Lajmin për infektimin e sulmuesit e njoftoi vetë klubi italian përmes një deklarate për shtyp, në të cilën thuhej se trajneri Stefano Pioli nuk do të ketë në dispozicion Ibrahimoviçin për ndeshjen e sotme.

Official Statement ➡ https://t.co/6s6puMNaON
Comunicato Ufficiale➡ https://t.co/lCUUuh3eB9 #SempreMilan pic.twitter.com/FhVh2peffQ

— AC Milan (@acmilan) September 24, 2020

Ky është një lajm i keq për Milanin, në një moment kur siç e ka cilësuar Pioli, përballen me “një finale” të sezonit, çka është kualifikimi për në Europa League, ndërkohë që ai pritet të mungojë së paku edhe në ndeshjen me Crotonen në kampionat.

Ibrahimoviç u kthye te Milani vetëm në janar të këtij viti dhe pavarësisht diskutimeve dhe spekulimeve zgjati kontratën deri më 30 qershor të vitit të ardhshëm. Gjatë karrierës së tij ai është lakuar shpesh për personalitetin dhe fizikun e fortë, aq sa shpesh të krijohen batuta me emrin e tij.

Në një koment në Twitter, ish-sulmuesi i kombëtares angleze Gary Lineker, i cili aktualisht drejton emisione sportive në Angli, tha me shaka se “mendimet shkojnë për virusin në këto kohë të vështira”.

News that @Ibra_official has tested positive with Coronavirus. Thoughts are with the virus at this difficult time.

— Gary Lineker (@GaryLineker) September 24, 2020

Më vonë vetë futbollisti e përcolli me të njëjtën shaka lajmin e infektimit të tij. Zlatan shkroi në Twitter se nuk kishte simptoma dhe më tej se “COVID-19 pati kurajon ta sfidonte” gjë që sipas tij “është ide e keqe”.

I tested negative to Covid yesterday and positive today. No symptoms what so ever. Covid had the courage to challenge me. Bad idea

— Zlatan Ibrahimović (@Ibra_official) September 24, 2020