Mbi 200 persona janë vrarë gjatë protestave në Iran

Mbi 200 persona janë vrarë në Iran që kur shpërthyen protestat mbarëkombëtare pas vdekjes në paraburgim të Mahsa Aminit. Lajmi u bë i ditur këtë të shtunë nga trupi kryesor i sigurisë iraniane, shkruan REL.

Amini, 22 vjeçe, vdiq më 16 shtator pasi u arrestua në Teheran nën pretendimet për shkeljen e rregullave të veshjes së hixhabit, apo shamisë së kokës.

Sipas agjencisë shtetërore të lajmeve, IRNA, Këshilli Suprem i Sigurisë Kombëtare tha se numri i viktimave gjatë trazirave “ka tejkaluar shifrën prej 200”.

Ky këshill tha se në këto të dhëna përfshihen zyrtarët e vrarë të sigurisë, civilët, “separatistët”, por edhe “rebelët” – term që përdoret nga autoritetet iraniane për të përshkruar protestuesit.

Një gjeneral i Gardës Revolucionare Islamike të Iranit, për herë të parë gjatë kësaj jave tha se mbi 300 persona kanë vdekur gjatë trazirave.

Këshilli i Sigurisë tha se përveç viktimave në njerëz, dhuna ka shkaktuar dëme në vlerë prej miliona dollarësh.

LEXONI GJITHASHTU

• Irani dënon me vdekje 4 të akuzuar për bashkëpunim me Izraelin
• Kërcënohen lojtarët e Iranit: Nëse protestoni, do të arrestohen familjarët tuaj
• Irani bën thirrje që SHBA të përjashtohet nga Kupa e Botës pasi i ndërroi flamurin