PD denoncon rastin e familjes nga Kruja, prej 10 muajsh në çadër: Shtëpinë të na e ndërtojnë ku e kishim

Partia Demokratike ka denoncuar këtë të diel rastin e familjes Preni nga Fshati Mazhë e Madhe, njësia administrative Bubq, në Krujë të cilët kanë humbur shtëpinë në tërmetin e 26 nëntorit të vitit të shkuar, dhe jetojnë prej 10 muajsh në çadër.

Ish-deputetja e PD, Orjola Pampuri ishte në familjen Preni, ku pa nga afër gjendjen e vështirë me të cilën janë përballur me stuhinë e shiut gjatë këtyre 3 ditëve

“Ne jemi familja Preni. Ministri i rindërtimit Arben Ahmetaj e ka përmendur ne televizor për…familjen tonë domethënë që do të ikin të gjithë. Po unë nuk mund të iki nga vendi im sepse unë kam bagëti, kam vendin tim këtu dhe s’mund të lëviz domethënë nga vendi im, nuk e shoh të drejtë këtë gjë. Nuk dua të merrem me llafe politike por e mira është që unë mos të lëviz nga vendi im këto dua unë. 10 muaj që jetoj në çadër edhe fëmijët janë në kushte të vështira normal që jetës e vështirë është këtu”, i tha ish-deputetes, kryefamiljarja Desilda Preni.

Ata janë shprehur të shqetësuar se situata do të vijë duke u rënduar për shkak të ardhjes së dimrit dhe përkeqësimit të mëtejshëm të motit.

“Shumë, shumë me frikë e kaluam mbrëmë që ishte një tmerr, domethënë gjithë ai shi gjithë ai situatë. Akoma s’ka ardhur dimri mirë jo kur të vijë I ftohti madh që është më  e vështirë për neve”, tha ajo.

Familja Preni kërkojnë nga shteti që shtëpinë tua ndërtojë në fshatin e tyre, aty ku kanë edhe tokat de gjënë e gjallë që s’mund t’i lënë pasi me to ushqehen.

“Peticionin e kemi bërë për të mos luajtur prej vendit këtu. Me na e bo shpinë këtu në vend”, shprehet kryefamiljari, teksa thotë se nuk kanë marrë asnjë përgjigje lidhur me këtë kërkesë.

Lexoni gjithashtu:

Me qira në pallatin e dëmtuar nga tërmeti, PD denoncon rastin e familjes në Lezhë