Një shqiptar i mbijetuar nga përmbysja e varkës në La Mansh

Katër persona janë mbytur pasi një varkë me emigrantë u ndodh në vështirësi teksa po kalonte kanalin anglez në orët e para të mëngjesit të së mërkurës.

Sipas informacioneve të fundit, 43 persona janë shpëtuar, 30 prej të cilëve ndodheshin në ujë. Ministria e Jashtme e Shqipërisë raporton se nga burime jo zyrtare mësohet se një prej të mbijetuarve është shqiptar, ndërsa mes katër viktimave nuk ka asnjë me shtetësi shqiptare.

Një operacion madhor kërkim-shpëtimi po zhvillohet në ujërat mes lokalitetit të Kentit dhe Francës, nën kushte të vështira moti.

Në reagimin e saj, qeveria britanike e cilësoi ngjarjen një “incident tragjik”.

Në një reagim në Twitter, ministrja e Brendshme Suella Braverman deklaroi se “mendimet më të përzemërta” të saj ishin me njerëzit e përfshirë në incident.

Ajo shtoi se po mbahet e informuar nga agjencitë ligjzbatuese.

Episodi i rëndë vjen një ditë pasi kryeministri i Mbretërisë së Bashkuar, Rishi Sunak njoftoi strategjinë e re për t’i dhënë fund emigracionit të paligjshëm përmes La Manshit, duke e vënë theksin tek fluksi i emigrantëve shqiptarë.

LEXONI GJITHASHTU:

• Ministria e Jashtme: S’ka viktima me kombësi shqiptare në Kanalin Anglez
• FOTO/ Kapiteni i peshkarexhës tregon bisedat me të mbijetuarit në Kanalin Anglez