Ndryshon struktura, pjesë e MZSH punonjës të FA dhe Policisë së Shtetit

Drejtoria e Përgjithshme për Mbrojtjen nga Zjarret dhe Shpëtimin, si një strukturë e specializuar e gatishmërisë në raste zjarresh apo  fatkeqësish natyrore do të pësojë disa ndryshime në organizim.

Me propozim të këshillit të ministrave, struktura dhe organika e kësaj drejtorie do të vijë si propozim i ministrit të Brendshëm, por do të miratohet nga kryeministri.

Kjo në nivel qendror, pasi drejtoritë në nivel vendor do të mbeten në varësi të bashkive.

Situata jo pak problematike me zjarret në muajt e verës, ka sjellë nevojën për disa ndryshime edhe në rekrutimin e punonjësve. Ku propozohet që në strukturat e këtij shërbimi të pranohen edhe ushtarakët aktivë dhe punonjësit e Policisë së Shtetit.

Në këtë mënyrë sipas relacionit shpjegues të projektligjit do të rritej cilësia e shërbimit dhe efektiviteti në menaxhimin e situatave të paparashikuara.

Vjetërsia e punës së këtyre punonjësve të cilët do të rekrutohen në shërbimin e mbrojtjes nga zjarret do të përkthehet në grada, duke u njohur kontributin e dhënë ndër vite.

Mosha e punonjësve për nivelin bazë në këto struktura, do të rritet nga 30 në 35 vjeç, ndërsa për punonjësit e nivelit të mesëm nën moshën 50 vjeç.

Pas konsultimit publik, ky projektligj pritet të kalojë në komisionet përkatëse e më pas edhe në seancë plenare për miratim.

LEXONI GJITHASHTU:

• Ceremonia për nisjen e punimeve për TK, Liçaj: Farsë, asgjë nuk do të ndërtohet
• Kapen 85 kg drogë në Fier, arrestohet 25-vjeçari, arratiset shoku i tij
• Uniforma 2 mijë € për gardianët në burgjet, mbyllet me “ankesa” tenderi 6.6 mln euro