Punonjësit e policisë së burgjeve do të vishen me uniforma dhe këpucë të reja, që do të kushtojnë rreth 2000 euro për individ. Tenderi me vlere 6.6 mln euro po shqyrtohet në komisionin e ankesave, pasi kompanitë që hynë në garë kanë ngritur pretendime në muajin  nëntor.

Drejtoria e Burgjeve planifikon t’i veshë punonjësit e saj me uniforma dhe këpucë të reja. Për këtë qëllim është vënë në dispozicion një fond me vlerë  6.6 milionë euro, ku 5.4 mln do të kushtojnë rrobat dhe 1.2 mln këpucët. Por, sa është kostoja për një efektiv? Policia e Burgjeve numëron rreth 3200 efektivë, çka do të thotë se për veshjen e një gardiani do të shpenzohen 2000 euro.

Në fakt, tenderi i mbyllur në javën e dytë të dhjetorit, nuk e ka një firmë fituese, pasi për një muaj që qëndroi i hapur dolën ankesa nga 2 kompani fasone që hynë në garë.

Një prej firmave fasone ka qenë e paqartë me kushtet e vendosura për materialet që do të prodhohen uniformat dhe kohën e pamjaftueshme për të përgatitur dhe dorëzuar mostrat.

Ndërkohë, firma e dytë ka kërkuar ndryshim të kritereve për të hyrë në garë.

Tashmë sipas rregullores, Komisioni i prokurimeve do të shqyrtojë ankesat dhe nëse do të shpallen të arsyeshme, gara rihapet me kushte të ndryshuara.

LEXONI GJITHASHTU:

• Presidenti Begaj në Delvinë, takim me kryebashkiaken e qytetit
• Sekuestrohen 3.2 ton kanabis në Kosta Rika, 7 persona të arrestuar
• Ndryshime në ligjin e emigracionit në Gjermani, çfarë përfitojnë të huajt