Kaosi me adresat, PD padit në SPAK ministrin Lleshaj: Qeveria synoi manipulimin e listave të votuesve

Partia Demokratike njoftoi pasditen e së premtes se ka paditur në Strukturën e Posaçme Anti-Korrupsion (SPAK), ministrin e Brendshëm Sandër Lleshaj dhe drejtorin e përgjithshëm të Gjendjes Civile, Bledar Doracajn.

Demokratët i akuzojnë dy zyrtarët e lartë për “falsifikim dokumentesh”, “shpërdorim detyre” dhe “shkelje të së drejtës së zgjedhjes”.

Padia, e firmosur nga Sekretari i Përgjithshëm i PD-së, Gazment Bardhi, kërkon nga SPAK-u që të sekuestrojë të dhënat kompjuterike të regjistrit kombëtar të Gjendjes Civile pasi nga këto të dhëna mund të “vërtetohen ndërhyrjet e paligjshme me qëllim ndryshimin e adresës së vendbanimit dhe pengimit të qytetarëve të votojnë, përmes ndryshimit të vendvotimit”.

“Rastet e denoncuara nga shtetas të ndryshëm për një periudhë rreth 2 javore mbi ndryshimet e vendbanimeve, pa dijeninë e tyre, tregojnë për tentativat për të manipuluar listat e zgjedhësve shqiptarë nga personat përgjegjës, ministri i Brendshëm dhe drejtori i Përgjithshëm i Gjendjes Civile,” – thuhet në padinë e demokratëve, të cilët pretendojnë se sipas ligjit ndryshimi adresave të qytetarëve ndryshon dhe qendrat e votimit.

Për këtë pretendim ata i referohen Nenit 46 të Kodit Zgjedhor në fuqi, ku thuhet se qendrat e votimit bazohen “te kodi i vendbanimit”.

Çështja në fjalë, e denoncuar në Euronews Albania në mesjavë, u konsiderua nga opozita si “manipulim zgjedhor”, ndërkohë që ministri Lleshaj dhe drejtori i Drejtorisë së Përgjithshme të Gjendjes Civile e konsideruan si problem të shfaqur nga bashkimi i regjistrave të vendbanimeve dhe atyre të adresave dhe që nuk ndikonte në zgjedhje.

Lexoni gjithashtu:

Ambasadorja Kim kërkon nga ministri Lleshaj të qartësojë çështjen e regjistrimit të votuesve

PD cilëson ”operacion manipulimi zgjedhor” ngatërrimet e adresave

Gabimi me adresat, Doracaj: S’ka ndryshim vendbanimesh, s’do ketë probleme për zgjedhjet

Kaosi me adresat, qytetarët ankohen se janë çregjistruar pa dijeninë e tyre