Rama: Luli çun i mirë, por se merr kush në telefon natën

Kryetari i Partisë Socialiste, Edi Rama gjatë Asamblesë Kombëtare ka bërë disa premtime bombastike për mandatin e tretë por edhe për periudhën që ka mbetur të këtij mandati. Ndër të tjera, kryeministri i vendit premtoi se aeroporti i Kukësit do të jetë i përfunduar para zgjedhjeve, kurse për aeroportin e Vlorës dhe Sarandës nuk dha datë konkrete për përfundimin e tyre.

“Unë o do t’i marr 120 demokratë nga ata që më shajnë rregullisht dhe do t’i ul në Kukës që të votojnë PD o s’ka. Mbajeni mend se çfarë po u them. Do hap konkurs në Facebook kush ka sharë më shumë. Aeroporti i Vlorës u pengua nga COVID për fat të keq. Javës tjetër do ta hapim procesin ku e kemi lënë. Vitin e ardhshëm do përfundojë, por nuk po jap datë, se na ikin datat jo për fajin tonë dhe dalin vlonjatët pastaj thonë aeroporti do ndërtohet në Surrel. Mandati i tretë do të mbyllet me tre aeroporte plus këtë që kemi”, deklaroi kreu i PS-së.

Nga ana tjetër, Rama premtoi ndërtimin nga e para të dy porteve më të mëdha në vend, atë të Durrësit dhe Vlorës, ndërsa portet ekzistuese në të dy qytetet u shpreh se do të kthehen në porte turistike.

“Portin e Vlorës do ta nisim në pranverë para përfundimit të mandatit. Do ndërtojmë portin e ri të mallrave dhe peshkatarëve në Tri Port. Portin e Durrësit, do të iki nga aty do të bëhet port turistik. Do të ndërtojmë portin e ri të mallrave në Porto Romano dhe kjo nuk do të ndodhi pas 100 vjetësh, por shpejt. Do fillojmë vlerësimet me qeverinë e Kosovës dhe për Portin e Shën Gjinit”, tha Rama.

Kryetari i PS-së bëri premtime dhe për infrastrukturën rrugore, duke përmendur projekte që pritet të financohen nga Bashkimi Evropian dhe vetë qeveria. Një ndër to ishte Korridori Blu, që bën fjalë për ndërtimin e një rruge në vijën bregdetare të vendit nga Murriqani deri në Vlorë. Rama nuk i kurseu akuzat për kundërshtarët politikë duke i paraqitur ata si barbarë.

“Në mandatin e tretë do ta bëjmë Shqipërinë të vrapojë. Jemi vendi i parë në rajon për thithjen e fondeve të BE në bujqësi. Jemi vendi i parë në Ballkan për shërbimet digjitale për qytetarët. Kur vijnë ata rrëmbejnë shinat e trenit për skrap. Ata, po panë shinë e çojnë për shkrap. Ata kanë probleme me hekurudhat se duan tramvaj elektrik”, u shpreh kreu i PS-së.

“Luli është shumë çun i mirë por a ka një shqiptar që kur ka një hall merr Lulin në tel natën. Edhe njerëzit e afërt thonë lerë mos e shqetëso se është orar gjumi. Ata janë mbrapa, prandaj ulërasin, kërcënojnë shantazhojnë pasi nuk e kanë shpejtësinë për të na arrit”, shtoi Rama.