Përkeqësimi i motit, Peleshi zbulon zonat që rrezikojnë të ketë përmbytje

Ministri i mbrojtjes Niko Peleshi, mbajti këtë të hënë një konferencë për shtyp, ku paralajmëroi zonat të cilat mund të kenë problematika si pasojë e përkeqësimit të kushteve të motit.

Peleshi tha se zonat e Shkodrës, Kukësit, Dibrës dhe Lezhës janë të rrezikuara nga vërshimi i lumenjve malor, duke rrezikuar të shkaktojnë përmbytje.

Peleshi nënvizoi gjithashtu se bashkitë dhe emergjencat civile kanë marrë të gjitha masat për të parandaluar përmbytjet përmes pastrimit të kanaleve.

“Deri tani nga raportimet e bëra në 24-orët e fundit nga qarqet nuk kemi situata problematike. Kuotat e lumenjve deri tani janë në kuota normale. Në qarqet Shkodër, Kukës, Dibër dhe Lezhë mund të ketë vërshime të shpejta të lumenjve të vegjël malor dhe rrëshqitje të dherave

Në zonat urbane në këto qarqe mund të shfaqen probleme, përmbytje të lokalizuara në varësi të gjendjes së kanalizimeve. Por dua të bëj me dije se të gjitha shtabet janë në gadishmëri. Bashkitë kanë punuar në kohë për të parandaluar përmbytjet përmes pastrimit të kanaleve.

Një sasi e jashtëzakonshme reshjesh në disa zona mund të na përballë me emergjenca të pashmangshme ndaj ka vlerë të marrim masa të tjera shtesë për të siguruar jetën e banorëve dhe pasuritë e tyre”, tha Peleshi.

LEXO GJITHASHTU:

• Përkeqësohet moti në vend, Peleshi: Reshje shumë intensive në Kukës e Shkodër
• Reshje dhe ulje temperaturash, parashikimi i motit për javën